Nangipeksa ti panagdudua ni acting Davao City Mayor Sebastian “Baste” Duterte iti agenda ti appointment ni Lieutenant General Jose Melencio Nartatez Jr. kas baro nga hepe ti Philippine National Police.
Iti maysa nga interview, kenuna ti mayor a saan na a personal nga am-ammo ni Nartatez ngem mamati isuna a siasinoman a madutokan ti nasao a posisyon ket adda pammilin a puntiryaen iti pamilya Duterte ken dagiti tagasuportada.
Daytoy a waragawag ket kabayatan ti panagsarungkar na kenni sigud a Presidente Rodrigo Duterte nga agdama a nakadetine iti International Criminal Court idiay The Hague, Netherlands.
Awan pay met ti sungbat ti baro a PNP OIC.
Ni Lieutenant General Nartatez ket naggraduar ti Philippine Military Academy Class of 1992 ken sigud nga NCRPO chief, Calabarzon regional commander, ken Deputy Chief for Administration. Nadutokan isuna kas maika-32 a PNP Chief idi Agosto 26, 2025, kasukat ni General Nicolas Torre III a naikkat iti puwesto kalpasan ti maipagarop a panangtagiawan iti pammilin ti National Police Commission seknan iti reassignments dagiti opisyal.
Segun kenni Interior Secretary Jonvic Remulla, iti desisyon ni Presidente Ferdinand Marcos Jr. a sukatan ni Torre ket paset ti panagregget a papigsaen iti akem ti Napolcom.#
