BR LA UNION – Inawagan ni Manila 6th District Representative Bienvenido Abante Jr. iti affidavit ti detainee a ni Ramil Madriaga, a nagpabigbig kas bagman ni Vice President Sara Duterte, kas “smoking gun” wenno katibkeran nga ebidensiya iti maikapat a reklamo nga impeachment kontra Bise Presidente.
Daytoy ti nagbalin a sungbat ti mammanday linteg idi masalodsod nu anya ti nagdumaan ti inyindurso da a reklamo nga impeachment kontra iti Bise Presidente manipud kadagiti immun-una a tallo a reklamo, iti maysa a presscon idi kalman, Pebrero 21.
Ngem adu kunana ti pagpadaan iti indatag da a complaint kadagiti immuna nga impeachment ni VP Sara, kabilang iti culpable violation of the Constitution, betrayal of public trust, graft and corruption, other high crimes, bribery ken dadduma pay.
Iti nasao a forum, inlanad ni Abante nga iggem na iti affidavit ni Madriaga a mangipakpakita ti maipagarop a “very close” a koneksiyon na iti Bise Presidente.
Segun kenni Abante, maipagarop nga innala ni sigud a Presidente Rodrigo Duterte ni Madriaga gaputa maipagarop nga eksperto iti imbestigasyon ken panag-ispiya.
Imbaga pay ni Rep. Abante a nakasagana ni Madriaga a sumango iti Kongreso tapno tumestigo ken mangnamnama ti mammanday linteg a kinapudno laeng ti ibaga ni Madriaga ken saanna nga ibabawi dagiti testimonya na iti affidavit.
Impaganetget ni Abante, nasken a takderan ni Madriaga ti sworn affidavit na, a binukel idi Davao City Mayor pay laeng ni VP Sara iti “Inday Sara Is My President” (ISIP) tapno maipatugaw a presidente, ken maipagarop a pinonduan iti grupo ti Philippine Offshore Gaming Operators (POGOs) ken dagiti drug lords.
Kabayatanna, immunan a pinaglibakan ni VP Sara ti maipagarop a pakainaiganna kenni Madriaga ken impaganetget na nga awan ti anyaman a direktiba na kenni Madriaga.
