BR LA UNION – Takderan ti sibubukel a puwersa ti Armed Forces of the Philippines (AFP) nga agtalinaed a solido ti organisasyonda iti laksid ti nagbalin a waragawag a “withdrawal of support” ni Col. Audie Mongao.
Iti press conference ita nga aldaw ti Martes, Enero 13, kinuna ni AFP Spokesperson Col. Francel Margareth Padilla, ti panangibabawi iti suporta ni Mongao ket saan a makaapektar iti puwersa, kayatna a sawen a sibubukel ti panagkaykaysa ti Armed Forces iti laksid dagiti isyu.
Awan pay ti nakatuding a pormal a kaso a maipila kontra kenni Mongao ngem impanamnama ni Padilla nga agtultuloy a maipas-pasidong iti imbestigasyon ti nadakamat nga statement.
Segun iti tagapasarita ti AFP, ti kaso ni Col. Mongao ket dumalan iti umno a proseso ken agbalin a patas, maiyannurot iti linteg ken polisiya ti Armed Forces of the Philippines.
Malaksid iti daytoy, impaganetget pay ni Padilla a saan a kasapolan nga ipasidong iti “loyalty check” ti sibubukel a tropada gaputa pattien ti puwersa armada nga am-ammoda dagiti personnels da ken agtaltalinaed ti panagtalek ken panagraemda kadagiti nangatngato nga otoridad.
Kinunana pay nga agtultuloy a suroten da ti sinapataan da a mandato ken agtalinaed a napudno iti organisasyon ken iti konstitusyon.
Kabayatanna, agtaltalinaed iti kustodiya ti militar ni Col. Mongao bayat nga agtultuloy ti imbestigasyon.
