Impaganetget ti Armed Forces of the Philippines (AFP) nga awan ti pagilian a makadiktar iti Pilipinas para kadagiti desision no maipapan iti depensa.
Segun kenni AFP spokesperson Colonel Francel Margareth Padilla, natural a karbengan ti tunggal estado ti mangpapigsa ken mangaramid kadagiti desision ti depensa agraman ti iseserrek ken pannakaipakat ti US Typhon Missile Launcher iti uneg ti teritorio ti pagilian.
Inaramid ti Armed Forces of the Philippines ti statement idi Biernes kalpasan nga inawagan ti China a napeggad ken iresponsable ti tignay a mangipakat ti nasao a weapon system.
Insungbat met ni Colonel Padilla a napeggad unay ti kaadda ti Beijing ken ti militarisasionna iti West Philippine Sea.
Dinakamat pay ti opisial ti AFP ti kaadda dagiti barko ti China a missile-capable kas “highly dangerous”.
Ti China ket addaan pay kadagiti artipisial nga isla kadagiti mapagsusupiatan a kabaybayan a militarized ken missile-capable metlaeng.
Inpakaammo ni Colonel Padilla a ti Pilipinas ket papatibkeren laeng ti defense capabilities babaen ti modernisasion, a mangpapigsa kadagiti aliansa ken awan ti sabali a pagilian a rumbeng a makakuestion iti dayta.
Pinasingkedan na pay a ti pannakaiyakar ti Typhon missile launcher iti saan a nadakamat a lugar kas paset ti training ken pannakapapigsa ti defence capabilities ti AFP.
Inlawlawag ni Padilla a karaman iti training ti mobilisation ti logistics train isu a tunggal kasapulan nga i-preposition daytoy kas panagsagana iti masungad nga aktibidad ket aramidenda.
Maipalagip nga inyeg ti militar ti US ti kastoy nga armas ditoy pagilian idi Abril ti napan a tawen kas paset ti joint military exercises.
