Nagpatroliya ti Armed Forces of the Philippines (AFP) idiay Luzon Strait ken nagisayangkat ti joint military exercise kadwa ti Estados Unidos idiay Mindanao.
Segun kenni Northern Luzon Command (Nolcom) commander Lieutenant General Fernyl Buca, ditoy Luzon ket nangisayangkat ti Northern Luzon Command (Nolcom) iti maritime patrol kadagiti coastal waters ti La Union agingga Batanes idi Abril 9 ken 10.
Nangisayangkat ti BRP Gregorio del Pilar (PS15), BRP Heracleo Alano (PC380), ken BRP Nestor Reinoso ti maritime drills kabayatan ti panagpatrolya da sadiay Luzon strait.
Nakumpleto da pay ti resupply mission kadagiti tropa a nakaistasyon kadagiti isla ti Batanes pakairamanan ti naval detachment idiay Mavulis island nga agserserbi kas shelters dagiti sundalo a nababantay ti kamurdongan nga Amianan a teritoryo ti Pilipinas.
Awan met sarday iti panagpatrolya dagiti barko ti Pilipinas laksid ti kaadda ti presensiya dagiti Chinese reasearch vessels ti Amianan a paset ti pagilian kalpasan nga impila ni AFP chief of staff General Romeo Brawner Junior iti Nolcom a saganaan ti posible a panagraut ti China idiay Taiwan, a pangpanggedan met dagiti nasurok 25K nga Overseas Filipino Workers (OFW).
Kabayatanna, idiay Mindanao met ket nangisayangkat ti Western Mindanao Command ti Marine Exercise (MAREX) 2025 kakadwa ti US Marine Corps idiay Barangay Penansaran, Datu Blah Sinsuat, Maguindanao del Norte idi Abril 9.
Naiyuswat ti simulated operation, live fire exercise, ken Full Mission Profile Amphibious Assault a segun kenni Westmincom commander Lt. Gen. Antonio Nafarrete ket naipamatmat ti kinapigsa ti military cooperation iti baetan ti Pilipinas ken Estados Unidos ken kinasagana ti pagilian iti complex littoral operational environment.
