BR LA UNION – Naragsak nga inawat ti Armed Forces of the Philippines iti baro a liderato ti Joint U.S. Military Assistance Group (JUSMAG) Philippines iti nagbalin nga introductory call dagitoy kenni General Romeo S. Brawner Jr.
Personal a nagsango da Gen. Brawner Jr. ken incoming Chief ti JUSMAG Philippines, Colonel Daniel Oh.
Iti diskusyon ket pinasingkedan manen ti dua a kampo iti suporta ti tunggal maysa.
Naminsan pay a siniguro iti dua a lider ti commitment a mapapigsa ti alyansa iti baetan ti US ken Pilipinas tapno mapatibker ken maprotektaran iti kinakapya ken seguridad ti intero nga Asia-Pacific Region.
Nagyaman met ni General Brawner iti agtultuloy nga assistance nga ipapaay ti JUSMAG iti naduma-duma a kapasidad, manipud capacity-building, training, agingga iti panangitulod ti logistical assistance.
Sukatan ni Colonel Oh ni outgoing chief Colonel Edward R. Evans a nangisayangkat metten ti exit call iti AFP idi Mayo-9.
Iti Joint US Military Assistance Group to the Republic of the Philippines ket agserserbi kas U.S. Security Assistance Organization (SAO) ditoy Pilipinas.
Iti lider daytoy ket maysa a senior Defense official ti US.
Resposibilidad ti lider nga idaulwan dagiti security ken non-security assistance mission ti US ditoy Pilipinas.
Kabilang ditoy iti Joint Combined Bilateral Exercise Program ken dadduma pay a military program, maiyannurot iti itudtuding ti Mutual Defense Board.
