Pinaglibakan ti Armed Forces of the Philippines ti agwarwaras a post mainaig iti baro a panagpintura iti BRP Sierra Madre, ti barko nga impasadya nga isadsad ti gobierno idiay Ayungin Shoal tapno agserbi a military post.
Ti nasao a post ket manipud ti maysa a facebook page, a ti kangrunaan a content ket mainaig ti defense ken military information.
Segun iti AFP, ti naikabil a ladawan ket ti BRP Laguna (LD-501) a saan nga ti BRP Sierra Madre nga addaan ti hull number LS-57, saan pay nga umiso ti pakabuklan a nilaon ti nasao a post a kasapulan nga ma-edit wenno maikkat.
Impaganetget ti kasundaluhan a ti saan nga umiso a panangdakamat kadagiti military assets ket mabalin a mangigubuay ti pannakatikaw ken misinformation.
Maipalpalagip met iti publiko a saan nga mangiwaras ti impormasyon nga awanan ti umdas a basaran, nangruna nu daitoy ket maipanggep ti militar ken defense information.
