BR LA UNION – Binabalaw ti Armed Forces of the Philippines (AFP) iti Southern Theater Command ti China kasaruno ti joint military exercises ti Pilipinas kadwa da ti Estados Unidos ken Canada idiay West Philippine Sea (WPS).
Impaganetget ni AFP spokesperson Colonel Francel Padilla, a ti Pilipinas ket saan a makibib-bibiang iti teritoryo ti sabali a pagilian ket iti laeng bukod na a soberanya ken teritoryo a nakailanad iti international law, iti ilab-labanna.
Iti waragawag ni Padilla ket sungbat iti waragawag ni Tian Junli, tagapagsarita ti Southern Theater Command ti China, a nangibaga a ti Pilipinas ket adda gandat na a kalluban iti maipagarop nga iligal nga aksyon na iti rehiyon ken pak-pakarwenna ti tensyon babaen ti “military provocations” ken “media hype.”
Iti maysa nga interview, inlawlawag ni Padilla, a saan nga expansionist dagiti Pinoy ken saan a makibib-bibiang iti teritoryo ti sabali a pagilian.
Iti WPS ket kabaybayan nga adda iti aglawlaw ti Kalayaan Island Group ken Bajo de Masinloc (Scarborough Shoal), ket paset daytoy iti EEZ ti Pilipinas.
Iti laksid ti desisyon, ket agtultuloy nga ipagpaganetget ti China dagiti karbengan na iti rehiyon ken inawaganna nga ”illegal” ken ”invalid” iti desisyon ti 2016 rulling.
Maipalagip nga idi Miyerkules, insayangkat ti Pilipinas, Estados Unidos, ken Canada iti maika-7 a Multilateral Maritime Cooperative Activity, maysa a joint military exercises nga addaan tarigagay a papigsaen iti kooperasyon iti Southeast Asian nation’s exclusive economic zone.
