LA UNION – Sumangsango iti kaso nga panaglabsing iti RA 9165 wenno Comprehensive Dangerous Drugs Act ti ag-ina ken dua nga sabsabali iti naisayangkat a buy bust operation idiay Barangay Ilocanos Norte, San Fernando City, La Union.
Nabigbig ti misis a ni Melissa Ganuelas, 37, call center agent, balasang, Linux Dylan Ganuela, 16, Dyken Frost Ganuelas 19, agpapada nga residente ti nasao a lugar, ken Christian Paul Munar, 17, residente ti Barangay Casilagan, idiay ili ti San Juan ditoy probinsya.
Nakumpiskar manipud kadakuada ti lima a plastic sachet iti maipagarop a napagango a bulong ti marijuana, P500.00 pesos kas buy bust money ken dadduma a drug paraphernalia.
Iti pannakiuman ti Bombo Radyo kenni Philippine Drug Enforcement Agency Region 1 Public Infotmation Officer Bismark Bengwayan, maipagarop naaktuan pay dagiti operatiba nga agpapot session dagiti suspek.
Iti agdama ket agtaltalinaed iti pagbaludan ni Melissa idinto a madama iti pannakaiproseso para iti pannakaiyakar iti Department of Social Welfare & Development (DSWD) Region 1 dagit menor de edad.
