BR LA UNION – Nangipeksa ti solido a kumpiyansa ni Bicol Saro Partylist Representative Terry Ridon nga adda umdas ken natibker a basaran tapno denggen ti Senado iti impeachment complaint kontra kenni Vice President Sara Duterte, nangruna kadagiti nadiskubre a ₱6.7 bilyon bank transactions ken ti makunkuna a pangta iti biag ni Presidente Ferdinand Marcos Jr.
Iti maysa nga interview, imbaga ni Ridon dagiti rimwar nga impormasyon iti panagdengngeg ti House Committee on Justice.
Segun iti mammanday linteg, ti dakkel a kantidad ti kuwarta a simrek ken rimwar kadagiti bank account ti Bise Presidente ken asawa na a ni Atty. Mans Carpio iti uneg ti sumagmamano a tawen, ket maysa a napigsa a basaran.
Malaksid iti mapagdudua-an a garaw ti kuwarta, impaganetget pay ti mammanday integ a dagiti immuna a hearing iti isyu ti confidential funds ket nangipakita ti nalawag a probable cause kontra kenni Duterte.
Kabayatanna, iti nakatuding a panagdengngeg inton Abril 29, namnamaen a desisyunan ti komite nu malukatan dagiti dokumento ti Bureau of Internal Revenue (BIR) nga adda pakainaigan ti kaso.
Naimbitaran met ni National Bureau of Investigation (NBI) Director Atty. Melvin A. Matibag tapno mangibinglay iti kanayunan nga impormasyon seknan iti maipagarop nga assassination plot ti Bise Presidente kenni Presidente Ferdinand Bongbong Marcos, First Lady Liza Marcos, ken sigud nga House Speaker Martin Romualdez.
Para kenni Ridon, uray awanen ti kanayunan nga ebidensya, umdasen ti mismo a waragawag ti Bise Presidente.
Tapno pormal a maisagpat ti kaso idiay Senado, kasapolan a makaala ti majority vote a 21 manipud iti 39 a miyembro ti House Committee on Justice.
