BR LA UNION – Nakatuding a pasingkedan ita nga aldaw ti Lunes, Mayo 4, ti House Committee on Justice iti report a mangirek-rekomenda ti Articles of Impeachment idiay Senado kontra kenni Vice President Sara Duterte.
Segun kenni House Justice Committee chair ken Batangas 2nd District Rep. Gerville Luistro, nalpasen ti komite a nangamiris iti probable cause dagiti ebidensya a naidatag kadakuada.
Rimwar iti panagdengngeg iti sumagmamano a nadadagsen nga alegasyon, kabilang iti maipagarop a biddut a pannaka-usar ti P612.5 million a confidential funds, ken P125 million ti maipagarop a nagastos iti uneg laeng ti 24-oras.
Dinillaw pay ti House Committee on Good Government and Public Accountability iti “envelope system” ken maipagarop a mapagdudua-an a resibo.
Iti sabali a forensic analysis ti National Bureau of Investigation (NBI), rimwar a napeke dagiti pirma.
Maibasar met iti report ti Philippine Statistics Authority (PSA), nadetermina dagiti peke a nagan dagiti recipient, bayat a kinumpirma met ti Commission on Audit (COA) iti disallowance nga umabot iti nasurok P73 million.
Maysa pay nga isyu a natalantan ket ti maipagarop a panagdakkel ti kinabaknang ni VP Sara.
Maibasar iti datos ti Ombudsman, aganay P88 million iti net worth na idi 2024.
Ngem imbaga ti Anti-Money Laundering Council (AMLC) nga adda nadiskubre da a mapagdudua-an a transaksyon nga umabot iti P6.7 billion a maipagarop a pakairam-ramanan ni Sara Duterte ken asawa na a ni Atty. Manases Carpio.
Karaman pay a maiyak-akusar iti maipagarop a “kill threat” kontra kada President Ferdinand Marcos Jr., First Lady Liza Araneta-Marcos, ken sigud nga Speaker Ferdinand Martin Romualdez.
