LA UNION – Umaboten ti P1-bilyon a barya ti adda ita iti sirkulasyon gaputa immadu metten dagiti Filipino nga agus-usar ti coin deposit machine (CoDMs) ti Bangko Sentral ng Pilipinas (BSP).
Segun iti Bangko Sentral ng Pilipinas, sipud inyuswat da ti nasao a programa idi Hunyo 2023 ket adda metten nasurok 240,000 a coin deposit machine transactions ti nailista.
Umabot metten iti nasurok 260 milyon a nagduduma a denominasyon ti barya ti naala ti bangko sentral ng pilipinas kadagiti coin deposit machines.
Maipalagip a naiyuswat ti nasao a programa tapno allokoyen dagiti Pilipino nga ideposito dagiti nakadulin wenno naka-alkansiya a barya, a makatulong tapno ag-recirculate manen iti ekonomiya bayat ti panangitandudo iti cashless transactions.
Plano ti Bangko Sentral ng Pilipinas a mangipatakder pay ti kanayunan a 25 coin deposit machines inton 2025.
