Natay dagiti saan a bumaba ti 132 nga indibidual pakairamanan dagiti uppat a pulis kalpasan ti nalawa nga operasion kontra kadagiti drug gangs idiay Rio de Janeiro, Brazil.
Naihelera dagiti dose-dosena a bangkay iti tengnga ti kalsada.
Segun ti state police, naplano a nasayaat ti nasurok dua a bulan dagiti raids a kangrunaan a puntirya ket ti maysa a major drug gang partikular iti Comando Vermelho wenno “Red Command” organization. Naidesenyo daytoy tapno iturong dagiti suspek iti kabakiran a nagurayan ti special operations unit tapno i-ambush dagitoy.
Kenuna ni Victor Santos, head of security ti Rio state, ninamnama da iti nangato a casualties ti operasion ngem saan da a nagayatan iti napasamak.
Inkari na pay iti panangisayangkat ti imbestigasion para ti aniaman a “misconduct” dagiti pulis.
Kenuna met ni President Luiz Inacio Lula da Silva, kasapulan a mataming iti panagngato ti drug violence nga agkasapulan ti koordinasion a mangpuntirya kadagiti gangs nga awan ti maisakripisyo a pulis ken inosente a pamilya.
Saan da a maawat nga agtultuloy a dadaelen dagiti organized crimes dagiti pamilia, mangipaay ti panagbuteng kadagiti residente, ken panangiwaras ti droga ken kinaranggas kadagiti siyudad.
Gapo ti pasamak, maysa a motorcycle caravan iti naisayangkat tapno i-protesta iti maipagarop a kinaranggas dagiti pulis. Iggem da iti bandera ti Brazil a namarkaan ti kulay nalabbaga nga ima.
Maipalagip nga idi 2021, natay dagiti 28 nga indibidual idiay Jacarezinho gapo met laeng ti drug raid.
(Reference: Reuters)
