Nainget a pinaglibakan ti Malacañang ti agwarwaras a dokumento ti Senado mainaig ti P150B a naisingit a pondo wenno pork barrel para ti 2025 national budget.
Segun kenni Palace Press Officer Claire Castro, ita da laeng a nangngeg ti damag mainaig kadagitoy a dokumento ngem saan da met nga ibilbilang daitoy nga issue ti Malacañang gapo ta awan met ti nakadanon kenkuada a kopya wenno report.
Maibasar ti nagsakap a dokumento manipud Senado, binilyon a pisos ti pondo para iti pork barrel a naitukon kadagiti lugar kas iti Bulacan (P12B), Sorsogon P9B, Mindoro (P8B), Batangas (P7B), ken dadduma pay.
Sakbayna ket kinuna ni Presidente Ferdinand Marcos Jr. a dimmalan ti nainget a panagadal ti 2025 national budget sakbay pay a napermaan tapno masiguro nga awan dagiti naisingit a saan nga otorisado a proyekto ken programa iti pondo ti pagilian.
