Impasigurado ni House Appropriations Committee Chair ken Ako Bicol Party-list Representative Zaldy Co a nadalus ken awan ti kurapsion ti Ayuda Para sa Kapos ang Kita Program wenno AKAP a proyekto para kadagiti Pilipino nga addaan iti trabaho ngem agtalinaed a nakurapay.
Inyunay-unay ni Co a saan a pork barrel ti AKAP gapu ta ti Department of Social Welfare and Development (DSWD) ti mangasikaso iti pondo ken mangilasin kadagiti benepisiario.
Impapilit ni Co a zero-percent corruption daytoy; nu sadino direkta a mapan kadagiti umili ken ti DSWD ti mangimatmaton.
Inbinglay ni Co a nabukel ti AKAP manipud iti reklamo dagiti minimum-wage earners kas iti food service crew ken Grab drivers, a saan a kwalipikado iti Pantawid Pamilyang Pilipino Program wenno 4Ps.
Kinunana, isuda dagiti nagaget a trabahador a dandani saan nga agin-inana, ngem agtaltalinaed a nakurapay gapu iti panagngato ti presio dagiti tagilako.
Ti AKAP, a nairugi idi 2024 babaen ti liderato ni House Speaker Martin Romualdez, ket addaan iti badyet a P26 billion para iti 2025.
Iti umuna a tawenna, dandani lima a milion a Pilipino ti nakaawat iti tulong a P5,000 iti kada pamilia.
Impaganetget ni Co a kayatna nga agtultuloy ti AKAP uray malpas ti terminona ken maigiddato iti dayta, impaganetgetna a kasapulan ti political will tapno mataginayon dagiti kastoy programa.
