Inyanunsyo ti Holy See Press Office a maangay ti Misa Pro Eligendo Romano Pontifice wenno Misa para ti panagpili ti baro a Santo Papa inton Miyerkules, Mayo 7, 2025, agarop alas-10 ti bigat wenno alas-kwatro ti malem, oras ditoy Pilipinas, sadiay St. Peter’s Basilica babaen ti panangidaulo ni Cardinal Giovanni Battista Re, Dean of the College of Cardinals.
Kabayatanna inton aldaw met ti Lunes, Mayo 5, 2025, pasado alas-5:30 ti malem wenno alas-11:30 ti rabii ditoy Pilipinas ket maangay ti panagsapata dagiti opisyales ken mangibagi ti Conclave sadiay Pauline Chapel ti Vatican Apostolic Palace. Karaman kadagiti agsapata ket dagiti pari, madre, doktor, guwardiya, ken dadduma pay a kameng ti Vatican.
Pormal met a mangrugi ti Conclave inton Miyerkules, Mayo 7 ti alas-4:30 ti malem wenno alas-10:30 ti rabii ditoy Pilipinas, nu sadino ket dagiti Cardinal Electors ket sumrek iti Sistine Chapel tapno marugian ti proseso ti panagbotos iti sumaruno a Santo Papa.
Dagiti Cardinal ket agsuot ti tradisyonal a kawes ti simbaan ken dumalan ti espiritwal a prusisyon agturong sadiay Sistine Chapel bayat a makankanta ti Veni Creator Spiritus. Nainget a maipatungapl ti seguridad ken limitado laeng ti makastrek ti uneg ti Conclave.
