LA UNION – Agkadwa iti maymaysa a selda ni dismissed Bamban, Tarlac Mayor Alice Guo ken maysa a pada nga akusado ni Kingdom of Jesus Christ (KOJC) Pastor Apollo Quiboloy, segun iti Bureau of Jail Management and Penology (BJMP).
Daytoy ket kalpasan nga immandar ni Pasig Regional Trial Court Branch 167 Presiding Judge Annielyn Cabiles ti panangiyakar iti kustodiya kenni Guo kalpasan a nakitaan ti probable cause iti naidatag a qualified human trafficking case kontra kenkuana.
Segun kenni Bureau of Jail Management and Penology (BJMP) Spokesperson Jail Supt. Jayrex Bustinera, namnamaen a maiyakar ni Guo manipud PNP custodial facility idiay Camp Crame agturong idiay Pasig City Jail Female Dormitory inton bigat, Lunes, Setyembre 23.
Siniguro ni Col. Bustinera, nga awan ti special treatment kenni Guo apaman a maibalud idiay Pasig City Female Dormitory.
Kinuna ni Bustinera, iti agdama ket napusek iti preso ti nasao a pagbaludan, ngem kasapolan a sumurot da iti bilin ti korte.
Kabayatanna, immunan a nangidatag ni Atty. Nicole Jamilla, legal counsel ni Guo, ti urgent motion idi Sabado idiay Pasig Regional Trial Court (RTC) a kumidkiddaw nga agtalinaed ni Guo iti PNP custodial facility.
