Nakalusoten ti naipasa iti House Committee on Children Welfare nga House Bill 8987 wenno singasing a mangdusa kadagiti nagannak wenno Ama a saan a kayat a suportaran dagiti annakda.
Segun iti kangrunaan nga autor ti bill a ni House Deputy Majority Leader ken ACT-CIS Party-list Representative Erwin Tulfo, dagiti “deadbeat” nga Ama nga agkedked a mangsungbat kadagiti annakda ket rumbeng a maibalud agingga iti innem a tawen.
Dinakamat ni Tulfo a ti suporta ti ama iti anakda ket nakadepende iti pagkasapulan ti ubing.
Kalikaguman ti bill a makipagtrabaho ti Department of Social Welfare and Development (DSWD) iti National Economic and Development Authority (NEDA) iti panangikeddeng no mano a suporta ti rumbeng nga awaten dagiti ubbing.
Immapela ni Tulfo kadagiti padana a lehislador nga ipasada ti gakat iti kabiitan a panawen tapno masungbatan dagiti awan pusona a nagannak wenno Ama a nangbaybay-an kadagiti bukodda nga annak.
