Nadutokan ni Archbishop Gilbert Garcera manipud Lipa kas baro a presidente ti Catholic Bishops’ Conference of the Philippines para ti maika-130 a Plenary Assembly idiay Anda, Bohol.
Isuna ti mangsukat kenni Cardinal Pablo Virgilio David iti Kalookan nga agleppasen ti maikadua a termino na inton Nobiember, agdama a tawen.
Pormal nga ag-akem iti puesto ni Garcera inton Disyembre 1 para iti dua a tawen a termino na. Maibasar iti panagsukisok ti Bombo Radyo ket aamoan a naipasngay ni Bishop Garcera idi Pebrero 2, 1959 idiay Magarao, Camarines Sur.
Naordinaran isuna kas padi idi tawen 1983 para ti Archdiocese of Caceres ken nagbalin nga obispo ti Daet manipud 2007 agingga 2017.
Nadutokan isuna kas Arsobispo ti Lipa idi tawen 2017, nga addaan ti nasurok 3.3M a mamatmati a masakopan na.
Nagserbi pay isuna kas chairman ti CBCP Commission on Mission ken Commission on Family and Life kasta met a nagbalin a paset ti CBCP Permanent Council kas mangibagi ti Southeast Luzon.
Para iti edukasyon ken addaan isuna ti doctorate iti Organization Development manipud Southeast Asia Interdisciplinary Development Institute ken master’s degree iti Religious Studies manipud Ateneo de Manila.
Kas baro a lider ti CBCP, idaluoan ni Garcera dagiti obispo para kadagiti isyu mainaig ti moral, pastoral, ken sosyal, bayat a paunegen a met ti konsultasyon babaen ti synodal journey ti Simbaan.
Nakagun-od ni Garcera ti pammadayaw manipud kadagiti kakadwa na a padi ken residente idiay probinsya ti Camarines a dimmakkelan ken nagserbian na.
