LA UNION – Nadetermina ti Philippine National Police (PNP) iti sumagmamano a miyembro ti aw-awagan nga “angels of death” nga ibilang ti pulisya a private army ni Kingdom of Jesus Christ leader Apollo Quiboloy.
Segun ken ni PNP spokesperson Police Colonel Jean Fajardo, adda ti listaan ni Police Regional Office 11 (PRO 11) chief Police Brigadier General Nicolas Torre III, iti nagan ti sumagmamano a miyembro ti nasao a grupo.
Immunan nga imbaga ti PNP a maibasar iti waragawag ti sumagmamano a biktima ti maipagarop a panagabuso ni Quiboloy, iti Angels of Death ti maipagarop nga ar-aramaten a pammutbuteng ni Quiboloy kadagiti ubbing a biktima na tapno saan dagitoy nga agipulong.
Imbaga pay ni Fajardo nga im-imbestigaran pay ti PNP nu adda iti Army reservists ken militiamen nga agserserbi a bodyguards ni Quiboloy a kabilang iti “angels of death.”
Kinuna ni Fajardo a ti “Angels of Death,” maibasar kadagiti ebidensya ken impormasyon a nakalap ti PNP ket pudpudno, a saan laeng nga imahinasyon.
Aggar-garawen ti PNP tapno kanselaren iti lisensiya ti paltog ken permit to carry firearms dagiti miyembro ti “angels of death.”
Ni Quiboloy ket nakabalud iti PNP Custodial Center idiay Camp Crame, Quezon City bayat a dagiti kakadwa na nga uppat nga akusado ket impa-akar ti korte idiay Pasig City Jail.
Sumangsango da Quiboloy iti kaso a panaglabsing iti Special Protection of Children Against Abuse, Exploitation, and Discrimination Act, ken qualified human trafficking.
Kabayatanna, pinaglibakan ni Atty. Israelito Torreon, legal counsel ni Quiboloy, iti rebelasyon ti PNP seknan iti grupo ken inawaganna pay a kalokwan iti `existence’ ti private army ni Quiboloy.
