Kumidkiddaw ni Davao Archbishop Romulo Valles kadagiti mangsupsuporta iti Kingdom of Jesus Christ kasta met dagiti kameng ti Philippine National Police nga agbalin a natulnog iti baet ti agtultuloy a rinnupak ti dua a dasig.
Segun kenni Arsobispo Valles, ar-aramidenna ti apela iti nagan ti kappia.
Kinunana a kasapulan nga agrinnespeto ti tunggal maysa ken bay-an nga agturay ti kapia.
Kiniddaw pay ti arsobispo kadagiti mangsupsuporta iti KOJC a respetuenda ti kaadda wenno pannakaipatungpal ti linteg.
Iti sabali a bangir, indagadagna pay nga agbalin a ‘considerate’ dagiti polis iti panangisayangkatda iti operasion iti uneg ti compound.
Inawaganna pay nga ‘alarming and troubling’ a makakita iti kasta a napaut a panagbirok nga addaan iti nakaad-adu a polis iti uneg ti compound a bahay-sambahan ken pakaang-angayan ti edukasyon dagiti agtutubo.
Kabayatanna, indagadag met ni Valles iti publiko nga ikararagda ti naan-anay a pannakarisut ti kasta a kasasaad.
