BR LA UNION – Layos ti pannaki-simpatiya ken aglad-ladingit dagiti padana nga artista ken loyalista a Noranians iti ipupusay ti kakaisuna a Superstar iti Philippine Showbiz Industry a ni Nora Aunor wenno nalatak nga ‘Ate Guy.’
Pimmusay ti primyado nga aktres idi kalman, Abril 16, iti edad a 71.
Ni Nora Aunor a “Superstar ng Pilipinas” ket maysa kadagiti kalatakan ken kalaingan nga artista iti pakasaritaan ti pelikula a pilipino.
Iti karera na ket napunno iti ballaygi ken panangbigbig iti laing na nga ag-arte ken kumanta.
Nagduduma ken kalalagip dagiti inakem na a papel iti sumagmamano nga iconic films, kas koma iti “Himala” idi 1982, “Bulaklak sa City Jail” idi 1984 ken “The Flor Contemplacion Story” idi 1995.
Iti pelikula na nga “Ang Himala” idi 1982 ket naawagan kas CNN APSA Viewers Choice Award iti Best Asia-Pacific Film of all time idi 2008.
Idi 1976, napangabakanna iti Best Actress honors iti Gawad Urian ken FAMAS iti umuna a gundaway iti pelikula a “Tatlong Taong Walang Diyos.”
Iti actress ti nabirngasan a kakaisuna a superstar ti Philippine entertainment industry ken napadayawan ti National Artist for Film and Broadcast Arts.
Isuna pay ti nabirngasan a kaunaan nga actress a KAYUMANGGI wenno morena.
Adu nga awards ti nagun-od na kadagiti pelikula na kas iti 19th Cairo International Film Festival idi 1995 iti pelikula a “The Flor Contemplacion Story”.
Maibilang isuna kas most nominated leading actress iti pakasaritaan ti FAMAS Awards nga addaan ti 17 daras a nagbalin a nominado sipud idi 1973, maikadwa isuna manipud iti pimmusay metten nga actor a ni Eddie Garcia nga addaan ti 23 nominasyon iti leading ken supporting role.
Isuna met laeng iti kakaisuna nga actress nga addaan ti kaadwan nga international best actress awards ken nominasyon.
Idi Hunyo 10, 2022 naipaayan isuna ti Order of National Artist ti pagilian.
Ni Ate Guy ket nakikallaysa kenni actor Christopher de Leon idi January 1975.
Addaan da ti maysa nga anak, ni Ian de Leon, ken uppat nga adopted children, isuda: Lotlot, Matet, Kiko, ken Kenneth.
Ngem nagsina dagitoy ken nawaswas ti kasar da idi 1996.
