BR LA UNION – Pimmusayen ti award-winning actor a ni Raoul Aragon iti edad a 78.
Kinumpirma daytoy ti maysa kadagiti anak ni Raoul a ni Rica, kas paset iti opisyal a waragawag ti pamilya ti aktor ngem saanna metten a dinakamat ti nakatayan ti ama na.
Kinuna na nga idi Enero 22 a pimmusay ti ama na idiay Downey, California, U.S.A.
Ti beterano nga aktor ket nangabak ti Best Actor Award idi 1979 iti pelikula nga “Ina ka ng Anak Ko” a pinagbidaan da Lolita Rodriguez ken Nora Aunor.
Naam-ammo pay isuna iti inakem na a papel kas Tio Kadyo iti pelikula a “Pasan Ko Ang Daigdig” kadwa na ni Megastar Sharon Cuneta.
Nagparang pay iti dadduma a pelikula a kas iti “Working Girls” ken “Waikiki” ken iti sumagmamano a teleserye a kas iti “Aguila” kadwa na ni Val Sotto.
Nakatuding a maiyawid ditoy Pilipinas ti bangkay ti aktor ken iti sumaganad nga aldaw ket maiyanunsiyo iti maipatungpal a public viewing.
