BR LA UNION – Baro a tukad iti karera ti nadanon ni Hollywood actress Zoe Saldaña kalpasan a nagballaygi iti takilya ti pelikula nga “Avatar: Fire and Ash” (2025), a nangipaay kenkuana ti titulo a highest-grossing actor of all time.
Naartapan ti 47-anyos nga Oscar winner ni Scarlett Johansson, kalpasan a kimmita ti nasurok US$1.2 billion iti intero a lubong ti maikatlo nga installment ti Avatar franchise.
Gaputi daytoy, umaboten ti nasurok ti US$16.8 billion ti pakabuklan a kita ti box office a pelikula a pakaitampokan ni Saldaña, segun iti film industry tracking site a The Numbers.
Maikadwa laengen iti puwesto ni Johansson nga addaan ti US$16.4 bilion.
Inakem ni Saldaña iti karakter a ni Neytiri iti tallo a pelikula ti Avatar, a kadwa na ni Sam Worthington kas Jake Sully manipud iti orihinal a pelikula idi 2009, a sinaruno ti “Avatar: The Way of Water” (2022), agingga iti kaudian a sequel.
Malaksid dayta, nabigbig pay iti papel na kas Gamora iti “Guardians of the Galaxy” a trilogy ti Marvel ken iti sumagmamano a pelikula ti Avengers, nga ad-adda a nangpatibke ti dominasyon na iti box office.
Nagakem pay kas Nyota Uhura iti na-reboot nga Star Trek trilogy, a ti pakabuklan ket nakapastrek ti nasurok a US$1 billion iti sangalubongan.
Ni Saldaña ti kaunaan nga aktres a nagparang iti uppat a pelikula a tunggal maysa ket nakapastrek iti nasurok a US$2 billion iti box office.
