Agtalek iti maysa a military historian ken defense analyst a rumbengen a makibiang ti Association of Southeast Asian Nation (ASEAN) iti gyera ti Thailand ken Cambodia tapno agibus ti tensiyon a nakatayanen dagiti 32 nga indibidwal ken nadistiero a nasurok 131K a tattao para iti Thailand ken nasurok 4K met iti biang ti Cambodia.
Manipud iti eksklusibo a pannakiuman ti Bombo Radyo iti defense analyst a ni Jose Antonio Custodio, kinunana a saan na pay a makitkitaan iti panagkalma iti sitwasyon kadagiti beddeng dagiti nasao a pagilian ngem adda iti posibilidad a marisut ti gyera nu makiballaet iti ASEAN a miembro ti nagpada a Cambodia ken Cambodia.
Saan met a naliklikan a babalawen iti defense analyst iti arig na panagdistansya ti Pilipinas babaen ti waragawag ti Department of Foreign Affairs (DFA) iti gyera dagiti pada na a member states.
Impaganetget ni Custodio a nasken nga ammo nga insigida ti ASEAN iti maiyannatop nga addang iti kastoy a sitwasyon.
Innayon na a kasapulan nga agbalin a proactive agsipud ta saan a daitoy iti umuna a gundaway ti kaadda iti gyera a karaman ti member state.
Maipalagip a napartuat ti gyera ti nagbaetan ti Thailand ken China idi World War II.
Kinunana a ti tensyon ti Thailand ken Cambodia ket problema ti ASEAN, isu a nasken nga iti asosasyon iti rumbeng a mangidaulo kadagiti peace talks nupay saan met a mailaklaksid dagiti itantandudo ti UN Security Council para ti posible a ceasefire.
Kabayatanna, adayo met a maaddaan iti spillover wenno panagwaras ti gulo iti nasao a gyera agsipud ta daitoy ket personal a problema mainaig iti kultura.
Nagpanawagan pay ni Jose Antonio Custodio iti gobierno ti Pilipinas a dapat ket bulgar nga ideklara iti panagbalin da a peacemaker kadagiti kaarruba na.
Iti agdama ket agtaltalinaed latta a nangato iti tensiyon kadagiti beddeng ti Thailand ken Cambodia para ti agtultuloy a gyera – maikatlon sipud idi aldaw ti Huebes, Hulyo 24.
Manipud met iti eklusibo a pannakiuman iti Bombo Radyo kenni Aljohn Argete Cañas, Bombo International News Correspondent idiay Bangkok, Thailand, limitado iti tensyon kadagiti border provinces ken agtaltalinaed latta a natalged ti kasaad iti sentro wenno idiay Bangkok.
Segun kenni Cañas, naideklara iti martial law kadagiti border provinces iti kangitingitan ti agtultuloy a tensyon ken inladawan ti sitwasyon dagiti agnanaed kadagiti apektado a lugar a napnuan iti panag-panic.
Nupay adayo ken awan iti tensyon iti sentro a Bangkok, adda met dagiti insidente ti panagprotesta, partikular iti mismo nga Embahada ti Cambodia a nakabase sadiay.
Dagos met a nangiruar ti ballaag ti Philippine Embassy idiay Thailand kadagiti Pilipino, nangruna kadagiti adda sadiay border provinces nga agannad ken tumawag kadagiti emergency contact hotlines para iti madagdagos a tulong.
Nagtaud iti border dispute ti Thailand ken Cambodia idi pay French colonial rule tawen 1907. Maysa a mapa iti nabukel tapno isina ti teritoryo a masakupan ti maysa ken maysa.
Gapo iti dayta ket nangrugi metten nga usaren iti Cambodia iti nasao a mapa kas basaran dagiti kukua da a teritoryo ngem saan daitoy a binigbig iti Thailand.
