BR LA UNION – Naaddaan manen ti ash emission iti Bulkan Kanlaon idiay Negros Island idi kalman.
Nailista daytoy agarop alas-2:32 agingga 2:40 ti malem.
Segun iti Philippine Institute of Volcanology and Seismology (PHIVOLCS), nangipugso ti napuskol a dapo ken asok iti kangato a 1,500 meters ken nagturong iti laod a direksyon.
Nagtinnag ti dapo iti residential area idiay Bago City ken arigna na-aplagan ti dapo iti atep dagiti babbalay, lugan ken mula.
Nanggubway daytoy ti saan a nasayaat nga angot kadagiti residente idiay Bago City partikular idiay Brgy. Mailum, Maao, Binubuhan, Abuanan, Dulao, Atipuluan ken Barangay Ilijan.
Agtaltalinaed nga adda iti Alert Level 3 iti Kanlaon Volcano, ken maipawil kadagiti residente a sumrek iti innem a kilometro a radius iti danger zone.
Pagan-annaden dagiti umili a rumuar nangruna dagiti addaan ti respiratory illnesses.
