Tinagibassit laeng ni sigud a Presidential spokesperson Harry Roque iti plano ti Department of Justice (DOJ) a panagkiddaw ti tulong idiay International Criminal Police Organization (Interpol) para ti naan-anay a pannakaarestar na.
Sakbayna ket imbutaktak ni DOJ Undersecretary Nicholas Ty ti plano iti ahesnya a panagkiddaw iti Interpol ti panangipaulog da iti red notice kontra kenni Roque para ti pannakarestar ken panagsango kadagiti kaso a sangsangwen na ditoy Pilipinas.
Inlawlawag ni Roque a nu adda ti agur-uray a petisyon para ti asylum ti maysa nga indibidwal ket saan isuna a mabalin a maarestar nga uray pay adda iti naipaulog a red notice kontra kenkuana.
Impaganetget ti International Criminal Court (ICC) accredited lawyer a saan paylaeng isuna a mabalin a magaraw gapo iti asylum petition na sadiay The Netherlands.
Maipalagip a kasaruno ti panagruar ni Attorney Roque saduay The Netherlands idi kangitingitan ti Marso ket naan-anay na metten nga impila ti asylum petition ken inrason iti political persecution ti administrasyon ni Marcos.
Idi laeng kallabes ket nangipaulogen iti warrant of arrest ti maysa a local court ti Pilipinas kontra kenni Roque gapo iti pannakainaig na iti human trafficking activities ti Philippine Offshore Gaming Operator wenno POGO hub idiay Central Luzon.
Nunpay kasta, indepensa met ti sigud nga Duterte appointee nga aramaten na laeng manen daitoy tapno mapapigsa iti request for asylum na.
