Sinungbatan ni Atty. Levito Baligod ti rebelasyon ni Ombudsman Jesus Crispin “Boying” Remulla maipanggep kadagiti ‘maleta deliveries’ a mapapati a nangrugi idi pay napalabas nga administrasyon.
Segun kenni Baligod, arig na pinasingkedan iti Ombudsman ti biang dagiti nagpaam-ammo a sigud a miembro ti Philippine Marine Corps ngem pinagbalin na laeng a politikal iti isyu idi inbinglay na daitoy iti publiko.
Impaganetget na a saan a maibilang kas intelligence ti nagtaudan dagiti impormasyon agsipud ta nausar laeng kas palusot dagiti daan a ladawan.
Kinarit pay ti abogado ni Remulla nga aklonen nu dagiti ‘delivery’ ti maleta ket lalo pay a nagsaknap ita a panawen ni Presidente Ferdinand “Bongbong” Marcos Junior.
Kabayatanna, kinuna met ni Ombudsman a maibasar kadagiti impormasyon ket kwarta ti nilaon dagiti maleta a maipatpatulod kadagiti mamanday-linteg a nangrugi sakbay pay ti tawen 2022.
Inallukoy na dagiti 18 a sigud a Marines a mangisubmitir ti nagsisina nga affidavit da kadagiti ammo da maipanggep ti isyu.
