Nasipdutan idi napalabas a Setiembre dati a Presidential Spokesperson Attorney Harry Roque iti dua a lugar iti Mindanao, segun iti Philippine National Police (PNP)
Ngem segun ken ni PNP spokesperson Police Brigadier General Jean Fajardo, tunggal mapan kenkuana dagiti otoridad ket aglibas ken saan dan a mabalinan a matiliw.
Naamuan nga umakar-akar ni Roque iti sabali a lugar gapu ta sakbay pay nga nasipdutan daytoy idiay Mindanao, adda nakakita kenkuanan iti Region 3 ken Calabarzon.
Inbatad ni Fajardo a nupay nakapokusda iti paset ti Mindanao, agtultuloy ti panagbirokda ken ni Roque iti amin a suli ti pagilian.
Maibasar iti report ti Bureau of Immigration (BI), saan pay a pimmanaw ni Roque ditoy Pilipinas.
Kabayatanna, binallaagan ti national police dagiti timmulong a nangilemmeng ken ni Roque wenno dagiti nangikamang kenkuana, a kunada a maidarumda iti obstruction of justice.
Maipalagip a sapsapulen ita ni Atty Roque gapu iti pannakacite in contempt na ti Quad Comm diay Kamara idi Setiembre 13 kalpasan a nagkedked a mangisubmitir kadagiti dokumento a mangilawlawag iti kellaat a panagadu ti kinabaknangna.
Segun met kenni Roque, “power tripping” laeng ti quad comm mainaig iti arrest order kontra kenkuana ken ti mapapati a koneksionna iti illegal operations dagiti Philippine offshore gaming operators (POGO).
