Manamnama nga agbalin a paset ti House prosecution panel ti beterano nga abogado a ni Atty. Lorna Kapunan.
Maibasar ti impormasyon a nagun-od ti Bombo Radyo Philippines, tumulong ti defense lawyer kadagiti kongresista iti panagdengngeg da ti kaso ni VP Sara sadiay Senate impeachment court.
Iti agdama ket awan pay met ti opisyal a kumpirmasyon manipud kenni Atty. Kapunan bayat nga umadanin ti tentative schedule ti panagrugrugi ti trial nga intuding ni Senate President Francis Escudero inton Hulyo 29, maysa nga aldaw kalpasan ti maikauppat a SONA ni Presidente Ferdinand Marcos Jr.
Ni Kapunan ket maysa a nalatak a defense lawyer nga addaan ti 40 a tawen a kapadasan ti law practice. Isuna pay ti founding partner ti Kapunan & Castillo Law Offices. Naturpos na ti law degree idiay University of the Philippines – Diliman ken nakapasa iti Bar idi tawen 1978.
Sumagmamano kadagiti nagbalin a nalatak a kliyente na ket isuda Hayden Kho, Rhian Ramos, James Yap, ken ti kontrobersyal a ni “Pork Barrell” queen Janet Lim-Napoles.
Idadauloan met ti House prosecution team ni House Minority Leader Marcelino Libanan, maysa kadagiti beterano nga abogado idiay Kamara. Makadwa na ti panel dagiti pada na a law experts nga isuda Chel Diokno ken Leila De Lima
