Awan ti moral authority ti sigud a Chief Presidential legal counsel a ni Salvador Panelo a mangkuestion iti desision ni Presidente Ferdinand Marcos Junior, partikular ti pannakaipaulog ti Executive Order 81, a nangorganisar iti National Security Council (NSC).
Daytoy ti inwaragawag ni Executive Secretary Lucas Bersamin seknan ti pannakaorganisar manen ti NSC a nakaikkatan ni Bise Presidente Sara Duterte kas panel ti konseho.
Kinuna ni Bersamin nga idi adda pay laeng ni Panelo iti puestona, naparegta met daytoy a mangikkat ken ni sigud a Bise Presidente Leni Robredo iti NSC panel.
Inyunay-unay ni Bersamin nga agserserbi ti NSC kas advisory body ti Presidente kas Commander-in-Chief ti Armed Forces of the Philippines.
Innayonna a responsibilidad ti Presidente a siguraduen nga adda panagtalek ken kumpyansa dagiti advisers kenkuana.
Adda karbengan ken turay ni Presidente Marcos a mangorganisar manen kadagiti opisina ti gobierno.
Inlawlawag ni Bersamin nga awan ti aniaman a personal iti panangipaulog ti Presidente iti EO 81.
