BR LA UNION – Saan a ‘bloodbath’ kas panangiladawan ni Vice President Sara Duterte ti mapasamak nga impeachment trial idiay Senado, ngem ketdi para daytoy iti panagsapol ti kinapudno ken panangsungbat ti nagbasolan.
Reaksiyon daytoy ni House Deputy Majority Leader Lorenz Defensor, maysa a miyembro ti House prosecution panel iti nagbalin a waragawag ti Bise Presidente a kayatna nga agbalin a nadara iti impeachment trial.
Imbaga ni Defensor nga agpada a rebbeng a nakasagana iti prosecution ken defense panel iti panangilanad ti kaso idiay Senado, nga agserbi nga impeachment court iti panaglukat ti maika-20 a Kongreso.
Segun kenni Defensor, agbalin a napartak para kadagiti umili nga awaten ti anyaman a pagbanagan ti panagusig kenni Duterte, guilty man wenno saan ti pangngeddeng.
Maipalagip nga idi Pebrero, sakbay a nag-adjourn iti sesyon, pinasingkedan ti kaadwan a miyembro ti Kamara de Representantes iti Articles of Impeachment kontra kenni Duterte.
Inakusaran da ni Duterte ti culpable violation of the Constitution ken betrayal of public trust gapu iti maipagarop a biddut a panangusar ti confidential funds ti Office of the Vice President ken kas sekretaryo ti Department of Education, a saan na a sinungbatan kadagiti panagdengngeg ti Kamara.
Impaganetget ni Defensor a ti impeachment ti maysa a nangato nga opisyal ket saan a maysa a judicial proceeding, ngem ketdi maysa a political process nga imat-matunan ti Konstitusyon ken iti bileg ti lehislatura.
