BR LA UNION – Sumangsango iti kanayunan a kaso ti maysa a babai a naibalud idiay Agoo custodial facility kalpasan a nadiskubre dagiti otoridad iti P27,000 a balor ti shabu manipud iti nagdagusanna a resort hotel idiay Barangay San Agustin Norte, Agoo, La Union idi malem kalman, Enero 20.
Segun kenni PCOL HERYL L. BRUNO, director iti La Union Police Provincial Office, naiyemplementar ti search operation iti nasao a resort hotel idi malem kalman, Enero 20.
Naamwan a kadwa ti suspek a naka check-in iti nasao a resort ti dua nga annak na a babbai.
Kinumpiskar dagiti otoridad iti uppat a sachet ti maatap a shabu, agdagsen ti aganay 4 a gramo ken dadduma pay a drug paraphernalia.
Immuna a naarestar ti suspek iti insayangkat a buy-bust operation dagiti otoridad idiay Brgy. San Agustin East, Agoo, idi Domingo, Enero 19.
Iti suspek ket maidatagan iti kanayunan a kaso a panaglabsing iti Sections 5 ken 11 iti Comprehensive Dangerous Drugs Act of 2002.
Kabayatanna, pinadayawan ni Col. Bruno iti operating units nga indaulwan ti Agoo Police Station gaputi ballaygi nga operasyon dagitoy.
