LA UNION – Nakabayog pay laeng ti Tropical Cyclone Wind Signal No. 1 idiay Davao Oriental gaputi bagyo Querubin.
Maibasar iti latest weather bulletin ti PAGASA, naudi a nakita iti sentro ti bagyo Querubin iti kaadayu a 230 km iti daya ti Davao City wenno 205 km daya ti Tagum City, Davao del Norte .
Nabuntog latta iti gunay ti bagyo a 10 kilometro kada oras bayat nga agturong iti amianan amianan-a-palaud.
Kabuyog na iti kapigsa ti angin nga 45 kilometro kada oras asideg iti sentro ken kapegges a dumanon iti 55 a kilometro kada oras.
Iti intero a forecast period, agtalinaed a tropical depression ti bagyo Querubin agingga a kumapsot ken agbalin laengen a remnant low pressue area ita nga aldaw ti Miyerkoles.
Nupay kasta, iti Shear Line ken bagyo Querubin ket mangigubway ti napigsa a panagtudo iti sumagmamano a lugar idiay Visayas ken Mindanao.
Partikular a makapadas ti narway a panagtudo ket iti Davao Oriental, idinto a mawaras-waras a panagtudo ken panaggarru-od ti mapasaran idiay Eastern Visayas, Caraga, ken nabatbati a paset ti Davao Region gaputi bagyo Querubin.
Idiay Bicol Region ken Quezon ket makapadas ti nalulem a panawen ken mawaras-waras a panagtudo kas epekto ti shear line.
Idiay Cagayan Valley, Cordillera Administrative Region, Aurora, Metro Manila ket nabatbati a paset ti Luzon ket maaddaan ti nalulem a panawen ken mapatto-pattok a panagtudo gaputi Northeast Monsoon wenno Amihan.
Agtaltalinaed iti ballaag ti PAGASA a posible iti layos ken landslide kadagiti prone areas a makapadas ti agtultuloy wenno napaut a panagtudo.
