LA UNION – Umad-adayun iti tropical depression a Romina nga adda iti ruar ti Philippine Areaof Responsibility (PAR) idiay Kalayaan Island ken agtur-turongen idiay Vietnam.
Maibasar iti 5:00 A.M. Tropical Cyclone Bulletin ti PAGASA, iti bagyo Romina ket naudi a nasaripatpatan iti kaadayu a 165 kilometro laud ti Pag-asa Island, Kalayaan, Palawan iti ruar ti Philippine Areaof Responsibility.
Kabuyog na pay laeng ti kapigsa ti angin nga umabot iti 55 kilometers per hour ken kapegges nga umabot ti 70 kph.
Agtur-turong iti amianan a palaud iti kapartak a 10 kilometro kada oras.
Naikkaten ti ballaag ti bagyo idiay Kalayaan Island, Palawan.
Imbaga pay ti PAGASA a saanen a makaapektar ti Tropical Depression Romina idiay Kalayaan Island.
Kabayatanna, iti Shear Line ti mangipapaay latta ti natudo a panawen idiay Southern Luzon ken Visayas idinto a Northeast Monsoon ti mangapektar iti nabatbati a paset ti Luzon.
Dagiti lugar nga apektado ti Shearline ken mangigubway ti mawaras-waras a panagtudo ken mapatto-pattok a panaggarru-od ket idiay
Visayas, Bicol Region, CALABARZON, ken nabatbati a paset ti MIMAROPA.
Gapu met iti Trough ti Tropical Depression ket maaddaan ti nakuyem a panawen, mawaras-waras a panagtudo ken panaggarru-od idiay
Palawan.
Bayat nga idiay Metro Manila, Cagayan Valley, Cordillera Administrative Region, Aurora, Bulacan, ken Nueva Ecija ket maaddaan ti nakuyem a panawen ken mabuyogan ti panagtudo gaputi Northeast Monsoon.
Kabayatanna, agtaltalinaed iti pammalagip ti PAGASA kadagiti maseknan a residente nga agridam gaputa posible iti layos ken landslide kadagiti prone areas a makapadas ti agtultuloy wenno napaut a panagtudo.
Balakad ti PAGASA nga agtalinaed a naridam gaputa posible latta iti panaglayos ken landslide nu agtultuloy ti panagtudo.
