Dua nga lawas ti napalabas ngem awan pay laeng iti nagdur-asan na iti ar-aramiden nga imbestigasyon dagiti otoridad mainaeg iti napasamak nga ambush iti ag-ama a mayor ken vice mayor idiay Balaoan, La Union.
Iti impaawag a press conference ni Balaoan Mayor Aleli Concepcion ita nga aldaw, kinuna na a nabuntog iti imbestigasyon dagiti otoridad.
Awan pay laeng kuna na iti nalawag a resulta nga inted dagiti otoridad ken maipagarop nga arigna adda ilmlimed dagitoy ken saan unay nga makikoordinar kadakuada.
Impaganetget ni Mayor Aleli nga iti napasamak nga ambush kadakuada nga ag-ama ket panangideklara ti gubat kontra iti sibubukel a kumunidad no sadino saanda nga maapresyar iti maar-aramidan dagitoy isu a naipatungpal iti dakes nga panggep.
Nupay kasta, nagpanawagan ni Mayor Aleli kadagiti umili ti Balaoan a sangsangkamaysa, saan a mabuteng ken agtinnulong tapno magun-od ti hustisya para iti pimmusay nga ama na.
Maipalagip, November 14, idi nga pinalpaltogan dagiti saan pay nga ammo nga tattao iti luganda Mayor Aleli nga nakatayan iti ama na a ni sigud a Vice Mayor Al-Fred ken ti body guard a ni Mike Jayson Ulep.
