Impateg ti maysa kadagiti co-convenor ti Atin Ito coalition ti nagbalin a desisyon ti Arbitration court iti mapagsusupiatan a teritoryo wenno paset ti kabaybayan idiay West Philippine Sea.
Kasaruno daitoy ti insayangkat da a ‘civilian mission’ iti nasao a teritoryo isu ket kayat da nga ipalagip iti publiko ti balligi ti Pilipinas kontra China.
Segun mismo dayta iti ekslusibo a pannakiuman ti Bombo Radyo Philippines kenni Kiko Aquino Dee, co-convenor ti Atin Ito Coalition idi madamag isuna maipanggep iti issue.
Impaganetget na a Pilipinas laeng ti addaan ti konkreto nga ebidensya ken maipakita a mangpaneknek ti balligi ti pagilian maipanggep ti kaso sadiay arbitration court idi tawen 2016.
Nupay kasta, saan latta a mailaksid ti narigat a sitwasyon a sangsangwen ti Pilipinas gapo iti kabaelan ken kapasidad nga addaan ti gobierno ti China para ti panagtagikua da ti teritoryo a saan da met a kukua.
Ti waragawag ni Kiko Aquino Dee, co-convenor ti coalition ket mainaig paylaeng ti radio challenge ti China kabayatan ti panaglayag ti nagluganan da a barko nga MV Kapitan Felix Oca.
Impaganeget ti China Coast Guard nga awan ti karbengan ti pagilian a mangisyangkat ti misyon wenno aniaman a panagdalyasat iti nasao a paset ti kabaybayan.
Inbinglay met ni Azril Omar, Coordination Committee Member ti World Forum for Fisher Peoples ti kasasaad dagiti mangngalap iti agdama a sitwasyon sadiay West Philippine Sea.
Kabayatanna, nangipeksa met dagiti kabangibang a pagilian ti Pilipinas iti panakipamaysa da iti sitwasyon nu sadino ket suportado da iti mensahe ti Atin Ito Coalition.
