LA UNION – Naideklara nga awan ti klase ken serrek iti opisina ita nga aldaw ti Biyernes, Nobyembre 23 idiay Balaoan, La Union maiyannurot iti direktiba nga inyetnag ni Balaoan Mayor Aleli Concepcion idi November 21, 2018.
Adda pakainaigan na daytoy iti sumagmamano nga aktibidad a maisayangkat ita nga aldaw iti nasao nga ili, partikular iti pannakaiturong ita a bigat iti bangkay ti napapatay a bise-mayor a ni Alfred Concepcion iti munisipiyo, kagiddan iti Walk for Justice & Black Friday of Mourning & Indignation.
Kabilang dagiti manamnama a makipaset iti nasao nga aktibidad ket dagiti mangisursuro manipud iti 18 a pagadalan iti elementarya ken lima met iti sekondarya, dagiti barangay officials manipud iti 36 a barangay a mangbukbukel ti ili a Balaoan, dagiti empleyado ti munisipiyo ken supporters dagitoy.
Kabayatanna, inton malem ket maiganwat met iti necrological services para iti bise-mayor.
Immunan a dinakamat ni 2nd District Board Member Carlo Concepcion a mangipaay ti mensahe ni Mayor Aleli kalpasan iti Walk for Justice para iti ama da.
Nakatuding met nga agsuot ti nangisit a bado dagiti sumurot iti Walk for Justice kas panangkondinar iti napasamak a pannakatambang kada Mayor Aleli a nakatayan ti ama na a ni Vice Mayor Al-Fred agraman body guard daytoy a ni Michael Ulep.
