LA UNION – Nabigbigen iti kinasiasino ti maysa a bangkay ti lalaki a mapapati a naiwalang ken nasarakan iti nasamek a lugar idiay Barangay Bilis, Burgos, La Union idi Hulyo 7.
Iti pannakiuman ti Bombo Radyo La Union kenni PCpl Rey Allan Sagun, imbestigador ti Burgos PNP, kinuna na a babaen iti panagturong ti kabsat ti biktima iti cuerpo ti pulisiya a ni Jaynard Mittay, 33-anyos, security guard, residente ti Barangay Green Valley, Baguio City ket kinumpirma na a kabsat na daytoy, managan Jay-R Mitang, 29, construction worker, residente ti Gibraltar, Baguio City.
Base iti imbestigasyon dagiti otoridad, natay iti biktima babaen ti pannaka-bekkel ken awan metten iti sabali pay a nakita a dunor iti bagi daytoy.
Segun kenni Cpl. Sagun, agtultuloy iti imbestigasyon tapno amwen dagiti suspek ken motibo ti panangpatay iti biktima.
Ngem segun iti SOCO nga indaulwan ni PLt John Baniaga, nakita da iti bulsa ti biktima iti maysa a transparent plastic sachet iti maatap a shabu.
Maipalagip a nasarakan iti bangkay ni Mitang iti asideg ti kalsada idiay Barangay Bilis ken nailadawan a nakasuot ti maong pants, barber ti pukis na, half naked wenno awan ti pang-ngato a kawes daytoy.
Anyaman nga oras ket maiyawiden ti bangkay idiay Baguio City manipud pannaka-asikaso daytoy iti punerarya ditoy La Union.
