Nangipila ni Parañaque 2nd District Representative Brian Yamsuan iti House Bill 9476 para iti pannakaidatag ti Barangay Legal Aid Desks (BLADs) ken Mobile Legal Clinics (MLCs) tapno maiyasideg iti libre a serbisyo-legal, nangruna kadagiti nasusulinek ken ‘underserved’ a komunidad.
Babaen iti singasing ket idauloan ti Department of Justice (DOJ) ken Public Attorney’s Office (PAO) dagiti mobile legal clinic a mangipaay kadagiti libre a konsultasyon, panagsagana kadagiti affidavit, kontrata, ken dadduma pay a legal a dokumento, agramanen iti mediation ken conciliation services.
Maaddaan payen iti tunggal barangay ti legal aid desk nga imaton dagiti nasanay para ti paralegal, volunteer lawyers, ken law student interns.
Segun kenni Yamsuan, adu a Pilipino ti marigrigatan a makaala iti serbisyo-legal gapo iti kaadayo dagiti korte ken abogado, kasta metten iti nangato a gastos.
Tarigagay iti singasing a maiyeg ti hustisya kadagiti komunidad, mapapigsa iti kapuotan iti publiko kadagiti karbengan da, ken mailungalong iti nakapia a pannakaresolbar kadagiti problema.
Karaman pay iti singasing ket dagiti insentibo para ti volunteer lawyer ken law student a kas kuma iti MCLE credits, tax deductions para ti pro bono legal services, ken internship credits.
Maidatag met iti Barangay Legal Assistance Council (BLAC) a mangipaton iti panagrang-ay ti programa.
