Idawat ni Representante Brian Raymund Yamsuan dagiti padana a lehislador nga aprobaranen ti digitalization proposal iti public school system a maikkan iti umuna a P500 million investment ti gobierno.
Ni Yamsuan ket maysa kadagiti autor ti nasao a singasing, babaen ti House Bill 276 wenno ti naisingasing nga Institutionalization of Digital Technology in Public Education Act, mapalubosan ti modernisasion dagiti public schools iti pagilian ken matulongan met dagiti mangisursuro ken estudiante nga agusar iti teknolohia kas powerful educational tool.
Impunto ni Yamsuan a saan a kas kadagiti pribado a pagadalan a mabalin nga ag-shift dagiti estudiante iti online classes bayat ti bagyo, layus ken dadduma pay nga emerhensia.
Kadagiti public schools, awan ti pagpilian no di ti mangisayangkat iti makeup classes wenno agusar iti modules no masuspende ti face to face classes, innayon ti Kongresista iti baro a pagannurotan ti DepEd maipapan iti class suspension.
Impaganetget ni Yamsuan a panawenen tapno agpuonan ti gobierno iti digital technology kadagiti public schools.
Kinuna ti Kongresista a masapul nga institutionalized ti digitalization kadagiti public schools tapno makasagana iti aniaman a karit a maipasango iti education system iti masakbayan.
Patien ni Yamsuan a dakkel ti maitulong ti digitalisasion tapno masigurado a future-ready dagiti estudiante kasta metten a globally competitive.
Iti nasao a singasing, kasapulan ti DepEd a mangaramid iti Digital Technology Road Map para kadagiti Public Schools babaen ti pannakitinnulong ti Department of Information and Communications Technology (DICT), Department of Science and Technology (DOST) ken Commission on Higher Education (CHED).
