Sinuportaran ni Representative Brian Raymund Yamsuan ti baro nga inisyatiba tapno mapapartak ti digitalization iti operasion dagiti lokal a gobierno.
Segun iti Kongresista, ti nadakamat nga addang ket maitunos iti adbokasiana a ti pannakaaramat ti teknolohia ket tapno alisto a maidanon ti suporta ken serbisio direkta kadagiti umili.
Kinuna ni Yamsuan a ti digitalization initiative ti baro a sekretario ti DILG a ni Secretary Jonvic Remulla ket saan laeng a mangkissay iti red tape iti panangipaay dagiti local government units (LGUs) iti serbisio, no di ket makatulong pay kadagiti target a benepisiario nga agkasapulan iti pudno a suporta a pinundoan ti estado.
Dinayaw ni Yamsuan ni Remulla gapu iti daitoy a plano para iti digitalization.
Segun iti mammanday-linteg, nabayagen nga idurduronna ti digitalisasion ken pannakausar dagiti moderno nga alikamen, saan laeng a para kadagiti LGU, no di ket para pay iti Philippine National Police (PNP).
Kinuna ni Yamsuan a kanayon nga dakdakamaten na kadagiti committee hearings iti Kongreso nga imbes nga pagduaduaan iti teknolohia, rumbeng a panunoten ken ipatungpal dagiti wagas a pakausaran daytoy tapno pagsayaatan dagiti Pilipino.
Impaganetget ti mammanday-linteg a ti teknolohia, agraman dagiti moderno nga alikamen kas kadagiti body-worn cameras para iti PNP ken science-driven investigative tools and processes ket makatulong a manglapped iti krimen, mangpapigsa iti panagtalek ti publiko ken kumpiyansa kadagiti pannakabagi ti linteg para iti natalna a komunidad.
Patien ni Yamsuan a makatulong pay ti digitalization a manglapped iti kurapsion ken mangallukoy iti ad-adu nga investors a maparegta a mangipasdek iti negosioda kas resulta ti naurnos nga operasion iti lebel ti lokal a gobierno.
Kabayatanna, inrugi metten ni Yamsuan ti programana a Bigay Ayuda at Oportunidad sa Nakababata wenno BAON babaen ti pannakitinnulong ti Department of Social Welfare and Development (DSWD).
Paset ti programa a BAON ti sabali pay a programa ti Kongresista kas iti Health, Opportunities, Peace and Education (HOPE) agenda, a panggep a siguraduen a maipaayan dagiti umili iti 2nd district ti Parañaque iti de kalidad ken abot-kaya a salun-at ken medikal; addaan iti umdas a gundaway iti panggedan ken pagbiag tapno maipangato ti kasasaad ti panagbiag; panangsigurado ti kappia ken kinatalged kadagiti komunidad; ken garantisado a pannakagun-od iti de kalidad nga Edukasion.
