LA UNION – Naideklara a dead on arrival iti pagagasan ti maysa a 12-anyos a barito kalpasan a malmes iti karayan idiay Tubao, La Union.
Nabigbig ti biktima a ni John Russel Lugue, residente ti Barangay Pangao-aoan idiay ili ti Aringay.
Maibasar iti inisial nga imbestigasion ti Tubao Police Station, naamuan a nagdigos ti barito iti Tubao river iti deppaar ti Brgy. Llones East.
Nupay kasta, nakita laengen ti maysa a concerned citizen a tumtumpaw ti bagi daytoy iti danum isu a dagusna nga intaray iti ospital ngem naideklara a pimmusay.
Itay laeng kanikadua ket dua met nga ubbing nga agtawen iti pito ti natay kalpasan a nalmesda idi Aringay river.
