BR LA UNION – Nangiruar ti Commission on Audit (COA) ti baro a notice of disallowance (ND) mainaig iti confidential funds ti Office of the Vice President (OVP), nga agdagup iti P300 million, segun kenni House Committee on Public Accounts Chairperson Terry Ridon.
Segun kenni Ridon, ti baro a notice of disallowance ket sabali iti immuna a desisyon ti Commission on Audit a nangkumpirma iti disallowance a P73 million confidential funds a maipagarop nga inusar ti OVP manipud Disyembre 21 agingga 31, 2022.
Inlawlawag pay ti kongresista a ti immun-una a P73 million disallowance ket addan iti final ruling ken mabalin a dumanon idiay Korte Suprema, idinto a ti baro a P300 million ket madama pay laeng iti audit review ken saan pay a pinal.
Segun pay kenni Ridon, ipakpakita ti notice of disallowance iti posible a nalawlawa nga isyu iti panagusar ti OVP iti confidential funds, nga isuti agtultuloy a kitkitaen dagiti otoridad.
Kabayatanna, agtultuloy ti panagdengngeg ti House justice panel seknan iti impeachment complaints kontra kenni Vice President Sara Duterte, a pakairamanan dagiti alegasyon ti maipagarop a biddut a pannakausar ti P612.5 million confidential funds, pangta kontra iti Presidente ken ti pamilyana, ken maipagarop a saan mailawlawag a kinabaknang.
Maipalagip a saan a dimmar-ay ni VP Sara kadagiti napalabas a hearing idi Marso 25 ken Abril 14, bayat nga agtultuloy ti imbestigasyon dagiti nadumaduma nga ahensiya, pakairamanan ti National Bureau of Investigation (NBI), a nangibaga nga adda met dagiti maipagarup nga iregularidad iti sumagmamano a pirma kadagiti dokumento mainaig iti confidential funds.
