Kidkiddawen ti depensa ni Bise Presidente Sara Duterte iti Senate impeachment court a palubosanda a mangidatag iti rebuttal evidence kadagiti alegasion a saklawen dagiti tallo a naikkat nga articles of impeachment.
Segun kenni Atty. Michael Wesley T. Poa, spokesperson ti defense team, saan da a pabor ti desision ti prosekusion a mangikkat iti Artikulo I, III ken IV. Ti pakaseknanda ket no maikkanda iti gundaway a mangidatag kadagiti saksi a mangsungbat kadagiti ebidensia a naidatag, nangruna iti banag a kompidensial a pondo ken nakaro a pangta. Damag ti Gobierno
Impetteng ni Poa a napateg a mangngeg ti publiko ti agsinnumbangir a dasig tapno naan-anay ti pannakaawatda kadagiti alegasion. Kayatda met nga ilawlawag dagiti saksida dagiti isyu a napagsasaritaanen ti prosekusion sakbay nga ikkatenda dagiti kasta nga artikulo.
Indilig pay ni Poa ti kasasaad iti impeachment trial ni sigud a Chief Justice Renato Corona, a segun kenkuana, saan pay a nangidatag ti prosecution iti ebidensia kadagiti artikulo nga insublina. Iti agdama a kaso, siguden a nangidatag ti prosekusion iti testimonia maipapan iti sumagmamano nga alegasion sakbay nga inkeddengna nga ibbatan dagitoy.
