LA UNION – Natayen idi masarakan a tumtumpaw ti bagi iti maysa a 21-anyos a baro a maipagarop nga adda diperensiya iti panunotna, iti karayan a sakop ti Brgy Lower Delles, Burgos, La Union idi agsapa’t kalman.
Iti biktima ket nabigbig iti nagan a Reymart Timmalog, residente iti nasao a lugar.
Iti pannakiuman ti Bombo Radyo La Union kenni Pol. Capt. Ramsey Ganaban, OIC chief-of-police ti Burgos Police Station, kinuna na a rimuar ti biktima iti balay da idi parbangon kalman, segun iti ama daytoy.
Segun pay kenni Ganaban, maipagarop nga ugali ti biktima a rumuar iti balay da a saan nga agpakada ngem agawid met laeng.
Ngem ita a gundaway, saanen a nakaawid ni Timmalog ken nakita laengen dagiti residente a nagturong iti karayan, iti tumtumpaw a bagi ti biktima.
Dagus nga inturong dagiti nagresponde a pulis kadwa da iti MDRRMO, iti biktima iti rural health unit, ngem indeklara a dead-on-arrival ti attending physician.
Iti agdama, am-amwen dagiti otoridad nu adda foul play iti pannakatay ti biktima, nupay immunan a naipadamag a nalmes daytoy gaputi napigsa nga ayus ti danum iti karayan.
