LA UNION – Nakabaluden iti maysa a 23-anyos a baro nga addaan ti kaso a rape kalpasan a maaresto daytoy idiay Barangay Lettac Norte, ili ti Santol, La Union.
Nabigbig ti akusado a ni Poland Victore, maibilang kas rank 7 most wanted person iti nasao nga ili.
Kinuna ni S/Ins. Felipe Ruiz Jr., hepe ti Santol Police Station, natiliw ti akusado gapu iti warrant of arrest nga inyatnag ti korte.
Awan met iti pinyansa nga intuding ti pangukuman gapu iti kinadagsen ti kaso daytoy.
Maigaparup a napasamak iti panagrames idi tawen 2015 ken agtawen laeng idi ni Victore iti 21-anyos, kabayatan a 16-anyos met ti nagbalin a biktima.
Adda ita iti salwad ti Balaoan District Jail ti nadakamat nga akusado.
