LA UNION – Suportado ni Department of the Interior and Local Government (DILG) Juanito Victor ‘Jonvic’ Remulla iti panangipatungpal ti nabaliwan ken baro nga Implementing Rules and Regulations (IRR) iti Republic Act (RA) 10592, wenno “Good Conduct Time Allowance (GCTA) Law.”
Daytoy ket kasaruno iti report manipud Bureau of Jail Management and Penology (BJMP) nga iti agdama a rate dagiti persons deprived of liberty (PDLs) ket umaboten iti 306 a porsyento wenno 117,767 PDLs kadagiti 482 a pagbaludan nga adda iti sidong ti Bureau of Jail Management and Penologu ( BJMP) iti intero a pagilian idi Oktubre 31.
Daytoy ket adayu iti ideal a populasyon iti pagbaludan a 33,325, a mangipakita a kasapolan ti addang tapno ma-decongest dagiti pagbaludan.
Iti mensahe nga indanon ni DILG Undersecretary Serafin Barretto Jr., impaganetget ni Remulla a ti na-update nga IRR ket makatulong iti mas naingkalintegan a sistema ti hustisya, a mangipaay ti gundaway kadagiti PDLs a maibaba ti sentensya dagitoy, nu mangipamatmat da iti napintas a kababalin wenno ugali, maiyannurot iti probisyon ti linteg.
Kumpiyansa ni Remulla a ti nabaliwan nga IRR ket mangpasayaat iti kasasaad iti pagbaludan ken mangsiguro iti nasayaat a pannakaipatungpal ti hustisiya, a patas ken inklusibo.
