Nagpanawagan ti progresibo a party-list group a Bayan Muna iti publiko nga agprotesta kontra ti pannakaitantan ti impeachment complaint ken tapno makalampag iti Senado nga ag-convene inton Hunyo 21.
Impunto ni Bayan Muna chairman Neri Colmenares nga uray pay nag-adjourn ti Senado kas legislative body, mabalin da latta nga ag-convene kas maysa nga impeachment court kas maiyannurot ti Senate rules.
Impaganetget na pay a nasken nga ag-convene iti Senado tapno awaten dagiti sungbat ti respondent ken marugianen ti impeachment trial kasaruno nga imbilin ti Senado kas impeachment court idi Hunyo 11 sadiay Office of the Vice President (OVP) a mangisubmitir da ti sungbat a saan a lumagpas ti sangapulo nga aldaw.
Inallukoy pay ni Colmenares ti Kamara de Representantes a dagos a sumungbat iti pammilin ti impeachment court a nagtignay a saan a mailabsing ti linteg iti impeachment complaint ken nakasagana da para ti panagdengngeg kasta met a sumango iti impeachment court inton Hunyo 21.
Nu saan a mapasamak kunana, ket ibaga dagiti dadduma a Senador a ti Kamara ti nangitantan ti panagdengngeg gapo iti saan a panagsurot ti pammilin ti korte. Nasken kunana nga isubli ti Kamara iti bola idiay Senado babaen ti panagkarit kadagiti Senador nga ag-convene kas impeachment court.
Kamaudiananna ket impunto na a saan laeng a dagiti umili idiay Metro Manila nu di ket agraman kadagiti probinsya ti intero a pagilian ti mangisayangkat iti protesta tapno kiddawen iti Senado nga ag-convene.
Nu kasta ket maamoanen ti nangigasgastosan ni Vice President Sara Duterte ti aganay P612-M a kwarta ti pagilian kasta met ti kinapudno na dagiti nakaawat ti kwarta kas ni Mary Grace Piattos, a dapat kinunana ket nausar iti libre nga agas, edukasyon, ken dadduma pay a social services.
