LA UNION – Naminsan manen a nagpalagip iti Bureau of Fire Protection kadagiti umili maipapan iti panagaramat iti christmas lights ita a Paskua ken Baro a Tawen tapno maliklikkan iti pannakauram.
Iti pannakiuman ti Bombo Radyo kenni FO3 April Jhon Tumbaga, chief public information officer ti BFP San Fernando City, La Union, kinuna na a siguraduen a natalged dagiti gatangen a christmas lights ken gumatang laeng iti produkto nga addaan ti accreditation wenno panang-aprubar ti Department of Trade and Industry (DTI), a saan ketdi a dagiti sub-standard.
Kinuna na pay nga anyaman nga aldaw ket mangisayangkat da ti inspeksiyon kadagiti pagtagilakuan kas iti department stores, malls, palengke ken kadagiti pagaramidan iti paputok tapno kitaen iti kinatalged dagiti maar-aramid ken mailaklako a produkto partikular dagiti arwaten nga adda pakainaigan na iti paskua.
